ءىس-شارانىڭ ۇيىمداستىرۋشىلارى الەمدىك ەكونوميكا جانە ساياسات ينستيتۋتى مەن قازاقستان رەسپۋبليكاسى تۇڭعىش پرەزيدەنتى – ەلباسىنىڭ قورى. وتىرىستىڭ كۇنتارتىبىنە ۇلكەن ەۋرازيانىڭ ستراتەگيالىق بولاشاعى مەن قاۋىپسىزدىكتىڭ وزەكتى ماسەلەلەرى قويىلعان. بەسىنشى سەسسيا بارىسىندا كلۋب قاتىسۋشىلارى ەۋرازيا مەملەكەتتەرى مەن حالىقتارىنىڭ دامۋ جولىندا تۋىنداعان وزەكتى ماسەلەلەرىن نازارعا الىپ, ايماقتىق ىنتىماقتاستىق ءۇشىن جاڭا مۇمكىندىكتەردى قاراستىرادى جانە بولاشاق جوسپارلارعا قاتىستى وي الماسادى.
تۇجىرىمدامالىق تۇرعىدا بارلىق تالقىلاۋلار باستى ماسەلەگە - ۇلكەن ەۋرازيادا جاڭا ىنتىماقتاستىق ارحيتەكتۋراسىن قۇرۋعا ارنالادى. اتالمىش تاقىرىپتى تاڭداۋعا سوڭعى 70 جىل بويى حالىقارالىق قاتىناستاردا تۇراقتىلىقتى قامتاماسىز ەتكەن عالامدىق ينستيتۋتتاردىڭ كۇيرەۋى مەن قۇلدىراۋىنىڭ اۋقىمدى پروتسەستەرى سەبەپ بولىپ وتىر.
ونىڭ ۇستىنە كۇيرەۋدىڭ شىڭى ءدال قازىرگى كەزەڭگە تاپ كەلۋدە. ول يادرولىق قاۋىپسىزدىك سالاسىنداعى ستراتەگيالىق كەلىسىمدەردىڭ جويىلۋى, دۇنيەجۇزىلىك ەكونوميكادا پروتەكتسيونيزمنىڭ ۇدەۋى, سونىمەن قاتار سانكتسيا سالدارىنىڭ ۋشىعۋى ماسەلەلەرىندە انىق كورىنىس تابۋدا. وعان قوسا, كليماتتىڭ قۇبىلۋى جاڭا عالامدىق قاۋىپ-قاتەرگە اينالعانى جاسىرىن ەمەس.
ناتيجەسىندە, ءبىزدىڭ دامۋىمىز قانشالىقتى تۇراقتى بولاتىنىنا قاتىستى ستراتەگيالىق بەلگىسىزدىك ارتىپ كەلەدى. وسى ماسەلەلەردىڭ بارلىعى اشىق جانە شىنايى تالقىلاۋدى قاجەت ەتەدى.
الەمدىك ەكونوميكا جانە ساياسات ينستيتۋتى ازىرلەگەن «2020 جىلعى ەۋرازيا ءۇشىن ەڭ ۇلكەن 10 قاتەر» ساراپتامالىق رەيتينگىسىنىڭ ەكىنشى باسىلىمى قاتىسۋشىلار مەن كوپشىلىك نازارىنا ۇسىنىلادى. تاۋەكەلدەر رەيتينگىسىنە ارنالعان بىلتىرعى ءبىرىنشى باسىلىم ۇلكەن سۇرانىسقا يە بولعاندىقتان, اەسي كلۋبتىڭ كەزەكتى وتىرىسىنا جاڭا باسىلىمدى دايىندادى. رەيتينگ ءتۇزۋ بارىسىندا اەسي ماماندارى زەرتتەۋ جۇمىستارىنا الەمنىڭ ۇزدىك 40 ساراپشىلارىن تارتتى.
استانا كلۋبىنىڭ قىزمەتىنە حالىقارالىق دەڭگەيدە قىزىعۋشىلىق تۋىنا, 2015 جىلى قۇرىلعان قازاقستاندىق پىكىر-سايىس الاڭىنىڭ قىسقا مەرزىمدە قازىرگى زاماننىڭ ەڭ كۇردەلى ماسەلەلەرى بويىنشا ەۋرازيانىڭ بارلىق شەشۋشى كۇشكە يە ۇيىمدارىنىڭ كوزقاراسىن ءبىر ارناعا توعىستىرا بىلگەن ناعىز جاھاندىق الاڭعا اينالۋى سەبەپ. بۇل رەتتە Astana Club قازاقستاننىڭ كوپۆەكتورلى سىرتقى ساياساتىنىڭ جارقىن كورىنىسى ىسپەتتى.
اشىلعالى بەرى كلۋب قىزمەتىنە الەمنىڭ 40 ەلىنەن 200-دەن استام ساراپشىلار قاتىستى. ونىڭ ىشىندە اقش, قىتاي, رەسەي, گەرمانيا, تۇركيا, ۇلىبريتانيا, فرانتسيا, جاپونيا, وڭتۇستىك كورەيا جانە ت.ب. ەلدەردىڭ وكىلدەرى بار. «استانا كلۋبىنىڭ» بەسجىلدىق تاريحىنداعى تانىمال ساياساتكەرلەر مەن ساراپشىلار قاتارىندا جوزە مانۋەل بارروزۋ, مۇحاممەد ءال-بارادەي, احمەت داۋىتوعلى, ۆاتسلاۆ كلاۋس, حاميد كارزاي, دجوردج فريدمان, يان مورريس, روبەرت كاپلان جانە باسقا دا مەيماندار بار.
«استانا كلۋبىنىڭ» جىلسايىنعى وتىرىستارىنا قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ قاتىسىپ, كەلەشەككە قاتىستى كەمەل ويلارىن ورتاعا سالادى.
«استانا كلۋبى» وتىرىستارى اياسىنداعى تالقىلاۋلار «ۇلكەن ەۋرازيالىق پىكىرسايىستى» قالىپتاستىرۋ مەن ىلگەرىلەتۋدە ماڭىزدى الاڭعا اينالعانىن اتاپ وتكەن ءلازىم. كلۋبتىڭ ءار وتىرىسى جاڭا قالىپتاسىپ كەلە جاتقان «ۇلكەن ەۋرازيا» فەنومەنىنىڭ وسى جانە وزگە دە اسپەكتىلەرىنە ارنالادى. ونىڭ قۇرامىنا ەۋرازيالىق مەگاقۇرلىق شەڭبەرىندەگى ازيا مەن ەۋروپانىڭ بارلىق مەملەكەتتەرى كىرەدى جانە ولاردىڭ ساياسات, ەكونوميكا, قاۋىپسىزىدك سالالارىنداعى قارىم-قاتىناستارى تاقىرىپتارعا تۇزدىق بولماق.
«استانا كلۋبىنىڭ» 2015 جىلى قاراشادا وتكەن العاشقى وتىرىسى ەۋرازيانىڭ گەوەكونوميكالىق ماسەلەلەرىن تالقىلاۋعا ارنالدى. ال ەكىنشى وتىرىستا ەۋرازيا كەڭىستىگىندەگى الداعى وزگەرىستەردىڭ مۇمكىندىكتەرى مەن قاۋىپ-قاتەرلەرى ءسوز بولدى.
كلۋبتىڭ 2017 جىلعى ءۇشىنشى وتىرىسى «ۇلكەن ەۋرازيا - 2027: تەكەتىرەس نەمەسە سەرىكتەستىك» تاقىرىبىندا ءوتتى. 2018 جىلعى ءتورتىنشى وتىرىستا ساراپشىلار «ۇلكەن ەۋرازياعا اپارار جول: ورتاق بولاشاقتى قالاي قۇرۋعا بولادى؟» تاقىرىبىن تالقىعا الدى.
كلۋبتىڭ مەرەيتويلىق بەسىنشى وتىرىسىندا «ۇلكەن ەۋرازيا: جاھاندىق ىنتىماقتاستىقتىڭ جاڭا ارحيتەكتۋراسى جولىندا» تاقىرىبى نازارعا الىنادى.
كلۋبتىڭ ساراپتامالىق تالقىلاۋىنا اقش, قىتاي جانە رەسەي اراسىنداعى قىرعي-قاباقتىڭ ۋشىعۋى, ساۋدا پروتەكتسيونيزمى مەن پوپۋليستىك كوڭىل-كۇيدىڭ ارتۋى, سونداي-اق الەمنىڭ كوپتەگەن ىستىق نۇكتەلەرىندە جاڭا شيەلەنىستەردىڭ بوي كورسەتۋى ماسەلەلەرى ارقاۋ بولماق.
بەسىنشى باسقوسۋدا ەۋرازياداعى ىنتىماقتاستىقتىڭ بولاشاق ارحيتەكتۋراسىن قالىپتاستىرۋعا, سونداي-اق جاھاندىق يادرولىق-زىمىران جارىسى سىندى جاھاندىق قاۋىپسىزدىكتىڭ نەگىزگى سىن-قاتەرلەرىنە جاۋاپ ىزدەۋگە ەرەكشە نازار اۋدارىلادى.
